VIII encontro de debate sobre o medio rural - Samos (7, 8 e 9 - marzo)

 ALTERNATIVAS EDUCATIVAS 

DE DESENVOLVEMENTO RURAL COMUNITARIO
  Información completa e inscrición aquí

A escola rural, inserida no seu medio e permeable á cultura comunitaria, é considerada como un laboratorio pedagóxico capaz de promover experiencias que acadan sempre recoñecemento no ámbito profesional e unha forte consideración nas súas comunidades de referencia e entre a cidadanía. No pasado, a escola rural foi considerada un referente cultural –ás veces, o único– de primeira magnitude. Aquelas escolas comunitarias son o xerme do que hoxe se considera un dos referentes pedagóxicos máis ricos: as denominadas “comunidades de aprendizaxe”. Estas experiencias contan coa capacidade pedagóxica da propia comunidade e contribúen á consecución de aprendizaxes máis significativas e de vivencias que axudan ao desenvolvemento integral das persoas en formación; son pois experiencias que desenvolven, da man da cultura e nos nosos particulares territorios de convivencia, verdadeiros espazos para a formación permanente ao longo da vida.

Diversos exemplos de iniciativas públicas deste tipo, pero tamén de escolas libres autoxestionadas, terán o seu espazo no programa da oitava edición do Encontro, que nesta ocasión levará por título ALTERNATIVAS EDUCATIVAS DE DESENVOLVEMENTO RURAL COMUNITARIO precisamente coa intención de poñermos o acento na dimensión comunitaria que todo proceso de desenvolvemento sociocultural e educativo ha de posuír, e moi especialmente cando se contextualiza no medio rural. O Encontro realizarase na fermosa vila de Samos (Lugo), concretamente no seu CEIP, co propósito de poñermos de relevancia e apoiar a modélica experiencia socioeducativa que a comunidade escolar local, especialmente sensibilizada a prol do medio rural, leva realizando nos últimos anos na liña antes sinalada.

A actividade realizarase en horario intensivo o sábado 7 (todo o día) e o domingo 8 (só de mañá) de marzo de 2015, e ao longo de todas esas horas de convivencia desenvolveranse diferentes propostas formativas (relatorios, mesa redonda, presentación de experiencias e boas prácticas educativo-rurais, un obradoiro sobre materiais didácticos) co seu correspondente espazo de debate e reflexión pedagóxica, pero tamén haberá tempo para poñer de manifesto e gozar a cultura rural galega a través dalgunhas das súas variadas manifestacións: música e baile da terra, literatura oral, artesanía, patrimonio arqueolóxico, poesía do labrego das letras (o poeta local Fiz Vergara Vilariño).

O grupo de educación no rural de NEG e a Asociación Un paso polo futuro (colectivo de nais e pais do CEIP de Samos) convocan pois a profesionais e estudantes dos eidos da educación ou o desenvolvemento rural, familias e calquera persoa preocupada pulo futuro do medio rural, para que se animen a participar nestas dúas xornadas de análise pedagóxica, reflexión comunitaria e convivencia compartida.

ENTODASASMANS proxecto audiovisual sobre as comunidades de montes

  

EN TODAS AS MANS

É un proxecto comunitario para a creación dun audiovisual que pretende mostrar o mundo

do monte veciñal galego. "Ao tempo, queremos sinalar as potencialidades que ten como ferramenta válida para a xestión e custodia do territorio próximo. Pretendemos sinalar a titularidade comunitaria como un elemento que fai parte do patrimonio cultural galego. Queremos que este proxecto sirva como recoñecemento para as persoas que conforman as comunidades de montes, os comuneiros e comuneiras. Desexamos estimular a súa participación e o orgullo por poder participar dun xeito de xestión do territorio propia, ao tempo que esa apreciación se expande ao conxunto da cidadanía galega."

Para máis información 

 http://www.entodasasmans.com/
 https://www.facebook.com/entodasasmans

O MUNDO RURAL GALEGO A DEBATE - 25.11.14

X Encontro Europeo de Comités de amigos do MST 24 - 26 outubro

 

Para máis información consultar a páxina web de Amarante

http://www.amarantesetem.org/

O MUNDO RURAL GALEGO A DEBATE

BANDA DESEÑADA: "Rural. Crónica de un conflicto", de Étiene Davodeau

Étienne DAVODEAU, Rural. Crónica de un conflicto, Barcelona, Ediciones de la Cúpula, 2013 [ed. orix. francesa, Eds. Delcourt, 2001]
Rural é un interesante exercicio de BD-documental onde o autor, segundo proclama no preámbulo, pretende plasmar "o relato dun anaco da nosa vella amiga a realidade". Ese anaco de realidade sitúase nunha pequena comunidade rural do departamento francés de Maine-et-Loire entre os veráns de 1999 e 2000 con algunhas regresións temporais necesarias para contextualizar o conflito ao que fai referencia o subtítulo da obra. A construción dunha autoestrada (a A-87) altera o proxecto económico e vital de moitos dos seus veciños, singularmente unha parella de neorrurais, que perderá por mor da obra a súa casa, froito de dez anos de duro traballo de rehabilitación, e tres labregos novos que asociados nunha AAEC (Agrupación Agrícola de Explotación en Común) están a levar adiante unha granxa ecolóxica de vacún para a produción de leite.
Identificamos perfectamente os diferentes actores do conflito: sectores enfrontados da comunidade, as autoridades locais e estatais, a concesionaria ASF (Autoestradas do Sur de Francia). Un marco institucional onde Sindicatos (dende a poderosa FNSA ata a Confederation Paysanne), asociacións de produtores, axencias de certificación xogan o seu papel. Podemos seguir o desenvolvemento do conflito pero tamén o ritmo regular dos labores cotiás da casa duns e da granxa dos outros.
En síntese un bo punto de partida para debater sobre as mudanzas acontecidas no mundo rural nas últimas décadas. Como conclúe o autor: "o valado [da autoestrada] separa dúas formas de proceder: dunha banda, un novo enfoque do medio ambiente respectuoso, lixeiro e sostible; da outra, unha infraestrutura pesada e contaminante que se impón pola forza en nome da rendabilidade a curto prazo. O inconvinte deste tipo de barreira é que, por forza, hai que se situar dunha banda ou da outra dela. Se te sentas enriba, pícaste o cú"